د کرنې وزارت مشرتابه د ملګرو ملتونو د خوړو او کرنې ادارې سره د باکیفیته کرنیزو تخمونو د تولید په اړه ناسته وکړه
۹ غویی ۱۴۰۵ه.ش
۱۲ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت کې د کرنې او مالدارۍ مرستیال مولوي صدراعظم عثماني او د ملګرو ملتونو د خوړو او کرنې ادارې «افاېاو» رییس ریچارډ ترینچارډ په ګډون غونډه جوړه شوه، چې پکې دسبو، غلهجاتو او حبوباتو د باکیفیته تخمونو د تولید په اړه بحث او د نظرونو تبادله وشوه.
د غونډې په پیل کې د کرنې او مالدارۍ مرستیال مولوي صدراعظم عثماني د کرنیزو تولیداتو د لوړتیا او ټولنې ته د سالمو خوړو د برابرولو په برخه کې د باکیفیته تخمونو پر اهمیت ټینګار وکړ او د معیاري تخمونو تولید یې د کرنې سکټور له اساسي اړتیاوو څخه وباله. نوموړي زیاته کړه، اصلاح شویو تخمونو ته د بزګرانو لاسرسی کولی شي د حاصلاتو په زیاتوالي او د هغوی د معیشت په ښه والي کې مهم رول ولوبوي.
ورپسې د ملګرو ملتونو د خوړو او کرنې ادارې «افاېاو» رییس ریچارډ ترینچارد هم وینا وکړه او ویې ویل، چې د افغانستان د بزګرانو لپاره د باکیفیته تخمونو د تولید په برخه کې د دواړو لورو ګډه او همغږې همکاري د دې ادارې له لومړیتوبونو څخه ده. هغه په دې برخه کې د تخنیکي ملاتړونو او ګډو پروګرامونو پر دوام هم ټینګار وکړ.
همداراز د غونډې پر مهال د ملګرو ملتونو د خوړو او کرنې ادارې «افاېاو» تخنیکي سلاکار استاد محبوبالله ننګ، د دې ادارې له لوري چمتو شوی پرېزنټېشن وړاندې کړ او د راټولو شویو معلوماتو او د تخمونو د تولید د وضعیت یوه بېلګه یې تشریح کړه.
د غونډې په پای کې د دواړو ادارو ګډونوالو د غلهجاتو، سبو او ارزښت لرونکو نباتاتو د تخمونو د برابرولو په برخه کې د ګډو فعالیتونو د پراختیا په اړه خپل نظرونه شریک کړل، چې په پایله کې د بزګرانو او ټولنې د اړتیاوو سره سم د یوه مشخص او منظم چوکاټ پر جوړولو هوکړه وشوه.
