د کابل ولایت سروبي ولسوالی په مهمندي سیمه کې مصنوعي ځنګل او د انارو بڼ جوړ شوي
۸ وری ۱۴۰۵ه.ش
۱۰ شَوّالُ المُکَرَّم ۱۴۴۷ه.ق
د کابل ولایت د سروبي ولسوالی د مهمندي په سیمه کې د کرنې، اوبولګولو او مالدارۍ وزارت له لوري یو مصنوعي ځنګل او د انارو بڼ جوړ شوی دی، چې د چاپېریال ساتنې او د بڼوالۍ د ودې په برخه کې مهم ګام بلل کېږي.
د یاد ولایت د کرنې ادارې مسؤلین وايي، چې د سروبي ولسوالی د کرنې کارکوونکي وخت په وخت له دغه مصنوعي ځنګل او د انارو له بڼ څخه لیدنې ترسره کوي او د بڼ د ښه ساتنې په موخه لازمې تخنیکي لارښوونې وړاندې کوي.
دوی زیاتوي، چې په یاده سیمه کې بڼوالو ته مسلکي مشورې هم ورکول کېږي، څو یاد بڼونه په راتلونکي کې له ستونزو او احتمالي ناروغیو څخه خوندي پاتې شي او ښه حاصل ورکړي.
د چارواکو په خبره، د دغو پروژو پلي کول نه یوازې د شنو سیمو په زیاتوالي کې مرسته کوي، بلکې د بزګرانو اقتصادي وضعیت هم پیاوړی کوي او د کرنې سکتور د پراختیا لپاره بنسټیز رول لري.
