د کرنې وزارت پلاوي په لغمان کې د پراختیایي او اقلیمي پروژو څخه لیدنه وکړه
۹ سلواغه ۱۴۰۴ه.ش
۱۰ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت د پلان او پروګرامونو د همغږۍ لوی رییس د یوه پلاوي په مشرۍ، د لغمان ولایت په مرکز کې د میداني کلي د چکډېم، چې د وزارت له پراختیایې بوجې او همدارنګه د اقلیمي بدلون له هغو پروژو څخه چې د ملګرو ملتونو د پرمختیايي ادارې «یوانډيپي» په مالي ملاتړ تمویلېږي، لیدنه وکړه.
د دغو پروژو په چوکاټ کې، د روان کال په ترڅ کې د لغمان ولایت په مرکز کې د بدیعآباد په سیمه کې ۳۰ زره د بیرې نیالګي او د کچو په کلي کې ۵۰ زره د عناب او مالټې نیالګي کېنول شوي دي.
د دې لیدنې پر مهال، د پلان او پروګرامونو د همغږۍ لوی رییس د څارنې او ارزونې له رییس او د کرنې وزارت له یو شمېر متخصصینو سره یوځای د پروژو تر پوښښ لاندې سیمې وکتلې او د اړوندو ادارو او د سیمې د خلکو له همکارۍ یې مننه وکړه. نوموړي همدارنګه د پروژو د تطبیق د لا ښه والي په موخه د امارتي ادارې تخنیکي برخو او د ملګرو ملتونو د پراختیایي پروګرام د تطبیق کوونکو مسؤلینو ته لازمې لارښوونې وکړې.
د کرنې وزارت د پلان لوی رییس د دغو پروژو پر پراختیا، پایښت او ساتنې ټینګار وکړ او په پای کې یې ډاډ ورکړ چې د کرنې وزارت به د دغو پروژو د لا ښه تطبیق په برخه کې هر اړخیزه همکاري وکړي.
