خوست کې د لایم سلفر مرکب چمتو او د استعمال عملي لارښود یې وړاندې شو
۹ سلواغه ۱۴۰۴ه.ش
۱۰ شَعبان المُعَظّم ۱۴۴۷ه.ق
د خوست ولایت کرنې، اوبو لګولو او مالدارۍ ریاست د کرنیزو چارو آمریت اړوند د بوټو ساتنې او قرنطین لوی مدیریت مسلکي کارکوونکو له لوري د لایم سلفر مرکب په لازم مقدار چمتو او د استعمال وړ وګرځول شو.
یاد پروګرام د کرنې، اوبو لګولو او مالدارۍ وزارت له خوا د ځانګړې منظور شوې بودیجې په ملاتړ عملي شوی، چې په نږدې راتلونکي کې به د خوست ولایت په مرکزي بڼ او همدارنګه په یو شمېر ولسوالیو کې پلي شي.
لایم سلفر یو اغېزمن محلول دی چې د نباتي ناروغیو او افتونو د کنټرول په موخه کارول کېږي. دغه محلول تر ډېره د میوه لرونکو ونو د استراحت (Dormant) په مرحله کې استعمالېږي او د ناکو، مڼو، بهیو او شفتالو ونو لپاره مناسب بلل کېږي، خو د نورو ونو لپاره د استعمال وړ نه دی.
د چارواکو په خبره لایم سلفرد فنګسي ناروغیو او افتونو د مخنیوي لپاره اغېزمن دی، کیمیاوي درملو په پرتله ارزانه تمامېږي، په کلیوالي سیمو کې په اسانه او محلي امکاناتو سره جوړېږي.
