خوست کې د کرنې د پیاوړتیا او د بزګرانو د عاید لوړولو په موخه نوې کرنیزې پروژې پیل شوې
۷ سلواغه ۱۴۰۴ه.ش
۸ شَعبان المُعَظّم ۱۴۴۷ه.ق
د ملګرو ملتونو د پرمختیايي ادارې «یوانډيپي» په مالي ملاتړ او د« ډبلیواېايآراو» مؤسسې په تخنیکي همکارۍ، د خوست ولایت په درې ولسوالیو؛ تڼې، صبری او موسیخېلو کې د کرنې د پیاوړتیا او د بزګرانو د عاید لوړولو په موخه مهم کرنیز فعالیتونه پیل شوي دي.
د یادې پروژې په چوکاټ کې ۱۵۰ تنه بزګران په مستقیم ډول تر پوښښ لاندې نیول شوي، چې د هغوی لپاره به په ټولیزه توګه په ۷۵ جریبه ځمکه کې د املوکو عصري بڼونه احداث شي. دا بڼونه به د معیاري طریقو له مخې جوړېږي، څو د حاصلاتو کچه لوړه او د بزګرانو اقتصادي وضعیت ښه شي.
سربېره پر دې، دغو مستحقو بزګرانو ته د پیازو او رومیانو هایبریډ تخمونه او اړین کرنیز وسایل هم وېشل کېږي، چې د دې مرستو د وېش عملي بهیر د خوست ولایت په تڼې ولسوالۍ کې په رسمي ډول پیل شوی دی.
چارواکي وايي، د دې پروژې پلي کېدل به د سبو تولید زیات کړي، د کورنیو د خوراکي اړتیاوو د پوره کېدو لامل به شي او په ټوله کې به د بزګرانو د عاید لوړولو او اقتصادي ودې په برخه کې مهم رول ولوبوي.
د یادونې وړ ده، چې د ورته پرمختیایي پروژو پلي کېدل کولای شي د کرنې سکتور پیاوړی کړي او په کلیوالو سیمو کې د خلکو د ژوند په ښه والي کې اغېزناک تمام شي.
