کرنیزو پورونو ته د ښځو د لاس رسي په تړاو د همغږۍ غونډه وشوه

۱۸ مرغومي ۱۳۹۸
د ننګرهار د کرنې ریاست د (AVC & HVC ) ادارو له لوري د کرنې په برخه کې ښځینه متشبثینو ته د پورنو د ورکړې په تړاو د دولتي ادارو او بانکونو له چارواکو سره د همغږۍ ګډه غونډه وکړه.
په دې غونډه کې، چې د ننګرهار د کرنې، اوبولګولو او مالدارۍ رییس ډاکټر محمد ضمیر بهسودي، د ښځو چارو ریاست استازې، د (AVC & HVC ) ادارو چارواکي، یوشمېر ښځینه متشبثینو او اړوندو چارواکو برخه اخیستې وو.
د ننګرهار د کرنې رییس ډاکټر محمد ضمیر بهسودي وویل: «دکرنې او مالدارۍ په برخه کې د اسلامي اصولو له مخې د پورونو ورکړه په دې برخه کې لا اسانتیاوې رامنځته کولای شي.»

ښاغلي بهسودي د کرنې ادارې له لوري مېرمنو ته په تېر کال کې د ترسره شويو فعالیتونو او راتلونکو پلانونو په تړاو هم معلومات وړاندې کړل.

ددې غونډې په ترڅ کې د بانکونو مسولینو د پریزټیشن په بڼه د پورونو د ورکړې په تړاو هر اړخیز معلومات له ګډونوالو سره شریک کړل.