د ملګرو ملتونو د خوړو او کرنې ادارې پلاوي د غزني دکرنې رییس چارواکو سره وکتل

۱۲ لیندۍ ۱۴۰۴ هـ.ش
۱۲ جُمَادَى الثاني ۱۴۴۷ هـ.ق
د ملګرو ملتونو د خوړو او کرنې ادارې «اف.اې.او» تخنیکي پلاوی د غزني ولایت د کرنې او مالداۍ ریاست د حیواني روغتیا آمریت چارواکو سره وکتل، چې موخه یې د حیواني روغتیا په برخه کې د تطبیق شوو پروګرامونو ارزونه او اړونده همغږي وه.
یاد پلاوی وروسته د اپیدمیولوژۍ له مدیر ډاکټر طالب سره یو ځای د واغظ ولسوالی ته ولاړ، چې هلته یې د څارویو د طاعون واکسین د تطبیق بهیر له نږدې وڅېړه. یاد واکسینونه تر دې وړاندې د حیواني صحت د ساحوي ټیمونو له لوري د بزګرو او مالدارانو اړوند څارویو ته تطبیق شوي وو.
د پلاوي غړو د واکسین کیفیت، د تطبیق طریقه، د حیواناتو عمومي وضعیت، د فارمونو ثبت او نور تخنیکي موارد له نږدې ارزولي او همدارنګه یې له ځایي مالدارانو سره مرکې کړې، څو د هغوی نظریات، ستونزې او د رضایت کچه معلومه کړي.
د پلاوی ارزونه مثبته وه او ډاډ ورکړل شو چې واکسینونه په معیاري ډول تطبیق شوي دي. همداراز د حیواني روغتیا پر ټیمونو ټینګار وشو چې خپلو خدماتو ته لا زیات دوام ورکړي، دقیق ثبتونه وساتي او د حیواناتو د ناروغیو د مخنیوي لپاره جدي پاملرنه وکړي.