د کرنیزو تخمونو د تصدیق چارواکو او د خصوصي سکتور له استازو سره د ازبیکستاني پلاوي لیدنه
۱۰ لیندۍ ۱۴۰۴ هـ.ش
۱۰ جُمَادَى الثاني ۱۴۴۷ هـ.ق
د ازبیکستان د کرنې او مالدارۍ مرستیال وزیر جمشید عبدوذوکروف په مشرۍ یوه پلاوي د کابل په بادامباغ کې د کرنیزو تخمونو د تولید د تصدیق ریاست له مسؤلینو، د کرنیزو تخمونو د تولید له یو شمېر شرکتونو، د افغانستان د قوریهدارانو د اتحادیې (ممقا) له رییس او د کرنې وزارت له یوشمېر متخصصینو سره لیدنه او خبرې اترې وکړې.
په دې ناسته کې دواړو لورو د کرنیزو تخمونو د تولید، د نوو ورایټیو معرفي کول، د راکړې ورکړې اسانتیاوې، د کرنې په سکتور کې د همکاریو زیاتول او د دواړو هېوادونو ترمنځ د اقتصادي اړیکو پراختیا خبرې اترې وکړې.
د کرنې وزارت مسؤلینو له ازبیکستاني پلاوي وغوښتل، چې د نباتاتو د کرنیزو تخمونو د تولید، کیمیاوي سرې، د آفتوژونکو درملو او د لوړ حاصل ورایټیو د وارداتو په برخو کې له افغانستان سره هر اړخیزه همکاري وکړي.
ازبیکستاني پلاوي د معلوماتو په وړاندې کولو سره وویل، چې دغه هېواد د پنبې، کچالو، سبو او مېوو په تولید، د اوبولګولو په سیستمونو او هغو نباتاتو کې چې لږو اوبو ته اړتیا لري، پراخ ظرفیت او تجربه لري، او د افغانستان له خصوصي سکتور سره د همکارۍ لپاره چمتو دی.
د کرنیزو تخمونو په برخه کې همکاري، د بڼونو جوړول او له افغانستان څخه د غوښې پېرود، کابل ته د ازبیکستاني پلاوي د سفر له مهمو موخو څخه دي.
