د کرنې وزارت مالي او اداري مرستیال په کابل کې د تولیدي شرکتونو او د مېوو او سبو له سړو خونو څخه لیدنه وکړه
۱۲ تله ۱۴۰۴ هـ.ش
۱۱ رَبِیعُ الْثاني ۱۴۴۷ هـ.ق
د کرنې، اوبو لګولو او مالدارۍ وزارت مالي او اداري مرستیال ملا آغاجان آخند «حاجي سالم»، د کابل ولایت په شمالي ولسوالیو کې له یو شمېر تولیدي شرکتونو او د مېوو او سبو د ساتنې له سړو خونو څخه لیدنه وکړه.
د دې لیدنې موخه د کرنیز سکتور په برخه کې د فعالو شرکتونو ملاتړ او ددې سکټور د ودې او پراختیا په پار د پانګوالو هڅونه ښودل شوې ده. د لیدنې پر مهال، د یادو شرکتونو چارواکو خپلې ستونزې، وړاندیزونه او نظریات د کرنې وزارت له مالي او اداري مرستیال سره شریک کړل، چې نوموړي د شته ستونزو د حل ژمنه وکړه.
ددې لیدنې په ترڅ کې دکرنې وزارت مالي او اداري مرستیال د عبدالجمیل صبوري د پلاستیکي محصولاتو سوداګریز او تولیدي شرکت، په میر بچه کوټ ولسوالی کې د ۷۰۰ ټنو په ظرفیت د دکوال وروڼو سړه خونه، د شکردرې په ولسوالی کې د ۴۰۰ ټنو په ظرفیت سره د برکت صبوري سړې خونې او په میر بچه کوټ ولسوالی کې د حاجي دل آغا سړې خونې څخه لیدنه وکړه.
دا لیدنې د حکومت او خصوصي سکتور ترمنځ د همکارۍ د پیاوړتیا او په هېواد کې د کرنیزو تولیداتو او پانګونې د لا ودې لپاره د زمینې برابرولو په پار ترسره کېږي.
