د ننګرهار وادي کرنيز شرکت کې د ۳۷ کیلوواټه لمریز برېښنا نوی سیستم فعاله او ګټې اخیستنې ته وسپارل شو
۳۰ چنګاښ ۱۴۰۴ ه.ش
۲۵ مُحَرَّمُ الحَرام ۱۴۴۷ه.ق
د انرژۍ د نوې بدیلې سرچینې د پراختیا په موخه، د ننګرهار وادي کرنيز شرکت لپاره د ۳۷ کیلوواټه ظرفیت لرونکی عصري لمریز برېښنا سیستم په بریالي ډول نصب، تخنیکي پړاوونه یې بشپړ، او رسماً ګټې اخیستنې ته وسپارل شو.
یاد سیستم د شرکت د داخلي ریاست، اړوندو دفترونو او د ادارې د اړتیاوو د پوره کولو لپاره جوړ شوی، چې له امله یې د برېښنا کمښت او نشتوالي اوږدمهاله ستونزه هواره شوې ده. د ننګرهار وادي کرنيز شرکت د کرنیزو چارو رییس انجنیر ظریف وايي، د دغه سیستم فعالېدو سره به د ادارې کاري بهیر له ځنډ او خنډ پرته پرمخ ولاړ شي، د خدماتو کیفیت به لوړ شي او د کارکوونکو د فعالیت کچه به هم ښه شي.
انجنیر ظریف زیاتوي، چې څه باندې دوه کاله وړاندې هم ورته لمریز سیستم فعال شوی و، خو د تخنیکي نیمګړتیاوو او کمزورو وسایلو له امله یې د اړتیاوو پوره کولو توان نه درلود. دا ځل د عصري تخنیک او لوړ ظرفیت لرونکو وسایلو په کارولو سره، د سیستم ظرفیت ۳۷ کیلوواټه ته لوړ کړل شو چې د ادارې ټولې انرژۍ اړتیاوې به پوره کړي.
د ننګرهار وادي کرنيز شرکت مشرتابه دا یو مهم پرمختګ بولي چې نه یوازې د ادارې د پیاوړتیا لامل ګرځي، بلکې د دوامداره خدماتو وړاندې کولو او د نوې ټېکنالوژۍ د تطبیق په برخه کې یو مثبت ګام ګڼل کېږي.
