ننګرهار کې زرګونو څارویو ته د طبق ناروغۍ پر وړاندې د واکسین کمپاین پیل شو
۳۱ غبرګولی ۱۴۰۴ ه.ش
۲۴ ذُو الحِجَّةِ ۱۴۴۶ه.ق
د ننګرهار د کرنې، اوبو لګولو او مالدارۍ ریاست سره په همغږۍ د افغانستان لپاره د هالنډ کمېټې په تخنیکي او د اروپایي ټولنې په مالي لګښت د ننګرهار په لسو ولسوالیو «حصارک، شېرزاد، خوږیانو، سره رود، رودات، چپرهار، کوزکونړ، کامه، بهسود او دره نور کې ۸۵ زره څارویو ته د طبق «اف،ام،ډي» ناروغۍ مخنیوي درملو تطبیق کمپاین پیل شو.
د ننګرهار د کرنې، اوبو لګولو او مالدارۍ رییس مولوي محمد ولي محسن دهالنډ کمېټې څخه مننه وکړه، چې د مالدارۍ سکتور د پیاوړتیا او ناروغیو سره د مقابلې په موخه وخت نا وخته بېلا بېلو برخو کې مرستې کوي.
ښاغلی محسن زیاته کړه، چې د ننګرهار په ۲۲ ولسوالیو کې په کافي اندازه مالدارۍ لرو نو په راتلوونکي کې پاتې ولسوالۍ هم په نظر کې ونیول شي.
د ننګرهار دکرنې رییس وټرنر داکترانو ته د درملو ښه تطبیق، د څارویو لرونکو سره د ښه چلند، درملو ښې ساتنې سپارښتنې وکړې او هم یې دهالنډ کمېټې څخه د ځینو نورو ناروغیو د مخنیوی په موخه د واکسینونو غوښتنه هم وکړه.
