لغمان کې د ۳۳ زره ډالرو په لګښت د شېدو پروسس مرکز جوړ اوګټې اخیستنې ته پرانستل شو
۱۰ غبرګولی ۱۴۰۴ ه.ش
۳ ذُو الحِجَّةِ ۱۴۴۶ه.ق
د لغمان ولایت د کرنې، اوبولګولو او مالدارۍ ریاست په هڅو او د افغانستان لپاره د هالینډ کمیټې په مالي ملاتړ، د علینګار ولسوالۍ د چنچار پل په سیمه کې د شېدو پروسس یو پرمختللی مرکز جوړ او ګټې اخیستنې ته وسپارل شو. دا مرکز د ۳۳ زره امریکايي ډالرو په لګښت جوړ شوی دی.
د مرکز د پرانستې مراسمو ته د کرنې ریاست د مالدارۍ او څارویو روغتیا امر ډاکټر جوادالله علیزاده، د اقتصاد ریاست استازي، د هالینډ کمیټې د مرکزي دفتر استازی ډاکټر فریدون قیومي، د هالینډ کمیټې ولایتي مسؤل ډاکټر محمد بیدار سیرت، او د سیمې ګڼ شمېر مالداران او فارم لرونکي راټول شوي وو.
د پرانستې په مراسمو کې ویناوالو دغه مرکز د لبنیاتو د پروسس او بازارموندنې په برخه کې یو مهم پرمختګ وباله. هغوی وویل، چې دا مرکز به د سیمې د مالدارانو د شېدو د پروسس لپاره عصري اسانتیاوې برابرې کړي او د هغوی اقتصادي وضعیت ته به مثبت بدلون ورکړي.
د هالینډ کمیټې د مرکزي دفتر استازي ډاکټر فریدون قیومي وویل: «دا پروژه د سیمې د مالدارانو د ستونزو د حل لپاره یو مهم ګام دی، چې له امله به یې د شېدو ضایع کېدو مخه ونیول شي او د بازار لپاره معیاري لبنیات وړاندې شي.»
یاد مرکز په اتو ساعتونو کې تر ۲۵۰۰ لیټره پورې شیدې پروسس کولای شي، چې دا به د لبنیاتو د ارزښت لوړولو او د مالدارۍ د ودې لپاره مهم رول ولوبوي.
