د هلمند د تکثیري فارم ۶۲۰ جریبه ځمکه کې د غنمو اصلاح شوي تخمونه وکرل شول

۱۸لېندۍ ۱۳۹۸
د هلمند دکرنې، اوبولګولو او مالدارۍ ریاست ددې ریاست اړوند د ګوهرګین د تکثیري فارم په ۶۲۰ جریبه ځمکه کې د بنیادي او تصدیقي تخمونو دتولید په پار د غنمو اصلاح شوي (بریډر) تخمونه د فني او مسلکي کارکوونکو تر څار او نظارت لاندې کرلي دي.
د هلمند دکرنې رییس زلمی الکو وایي، چې د نوموړو تخمونو حاصلات به وروسته هلمند کې خصوصي سکټور ته په واک کې ورکړل شي او یاد سکتور به ددې ادارې د کړنلارې له مخې دغه تخمونه په خپلو ځمکو کې کري، د کرلو له پیله بیا تر رفع حاصل پورې یې ټولې چارې د کروندو د څېړنې موظفو کارمندانو لخوا تر څېړنې او ارزونې لاندې نیول کیږي او وروسته د لابراټوار د تجزې څخه به صحي او روغ تخم ته تایید او سرټفکټ ورکول کيږي.
له یادو ټولو فني پړاوونو وروسته نوموړي تخمونه بزګرو ته په واک کې ورکول کیږي، ترڅو ځمکوال سالم تخم وکري او ښه حاصلات ورڅخه لاسته راوړي.
د هلمند د کرنې ریاست په پام کې لري، چې هلمند کې د بېلابېلو تخمونو د اصلاح، ترویج او تکثیر په برخه کې کار وکړي ترڅو له مخې یې د ځمکوالو او کروندګروحاصلات لوړ او د قناعت وړ عاید ترلاسه کړي.