پکتیا کې نیالګیو پلورونکو څخه څارنه ترسره شوه

د پکتیا ولایت د کرنې، اوبولګولو او مالدارۍ ریاست په ګډون د ولایت مقام په کچه ګډ پلاوي لخوا ددې ولایت د مرکز ګردیز ښار د مثمر او غیر مثمر نیالګیو پلورونکو څخه څارنه ترسره کړه.
په یاده څارنه کې د پکتیا ولایت د کرنې، اوبولګولو او مالدارۍ ریاست، د ګردیز ښاروالۍ او د چاپیریال ساتنې ریاستونو استازو ګډون کړی وو.
ددې څارنې په ترڅ کې د یاد پلاوي لخوا د نیالګیو پلورونکو ته لازمې سپارښتنې وشوې او ویې وویل، چې، هغه نیالګي چې ددې ولایت له چاپېریال او هوا سره توافق ونلري او یا هم ددې ولایت له تصدیقي قوریو لیبل ونلري باید ونه پلورل شي.
همدارنګه یادونه یې وکړه، چې له نورو ولایتونو د نیالګلیو له انتقال څخه ډډه وکړي او کوم نیالګي، چی په دی ولایت کې نه پیدا کېږي له هغو ولایتونو څخه دې راوړل شي، چې لیبل او ددې ولایت چاپېریال او هوا سره توافق ولري.
په پای کې د ګردیز ښار د نیالګیو پلورونکو څخه تعهد واخسیتل شو چې په راتلونکې کې به د یادو پر اساس نیالګي وپلوري.