میدان وردګو کې د حیواني او نباتي درملتونونو څارنه وشوه
۲۰ سلواغه ۱۴۰۳ه.ش
۹ شَعبان المُعَظّم ۱۴۴۶ه.ق
د میدان وردګو ولایت د کرنې، اوبولګولو او مالدارۍ ریاست مسلکي کارکوونکو په دې ولایت کې د حیواني او نباتي درملتونونو څارنه وکړه، څو د بېکیفیته او تاریختېرو درملو د پلور مخه ونیسي.
د دې څارنې پر مهال، درمل پلورونکو ته سپارښتنه وشوه چې د بېکیفیته درملو له پلور څخه ډډه وکړي، حیواني او نباتي درمل سره جلا وساتي، د درملتونونو پاکوالي ته پام وکړي، او خپلې چارې د کرنې وزارت د اصولو مطابق پر مخ یوسي.
همداراز، هغه درملتونونه چې د فعالیت قانوني جوازونه یې نه لرل یا د جواز موده یې پای ته رسېدلې وه، وتړل شول. پلورونکو ته لارښوونه وشوه چې ژر تر ژره خپل جوازونه نوي کړي. پر دې سربېره، هغو درملتونونو ته چې غیرمسلکي کسانو اداره کول، لازمې سپارښتنې وشوې.
د دې ارزونې موخه د غیرمسلکي کسانو له لوري د بېکیفیته او تاریختېرو درملو، او غیرقانوني درملو د پلور مخنیوی و.
