میدان وردګ کې بزګرانو ته د غنمو اصلاح شوي تخم او کیمیاوي سرو وېش پیل شو  

میدان وردګ ولایت کې د ۷۰۰ بزګرانو لپاره د غنمو اصلاح شوي تخم او کیمیاوي سرو وېش لړۍ د کرنې ریاست تر چتر لاندې، د ایف اې او نړیوالې ادارې په مالي ملاتړ، د سټارز مووسسې له لارې پیل شوه.
د میدان وردګ ولایت د کرنې، اوبولګولو او مالدارۍ ریاست په همکارۍ، د سټارز مؤسسې له لارې د مرکز میدان ښار اړوند ۷۰۰ بزګرانو ته د غنمو اصلاح شوي تخم او کیمیاوي سرو وېش لړۍ پيل شوه. هر بزګر ته به ۵۰ کیلو د غنمو اصلاح شوی تخم، ۵۰ کیلو توره سره او ۵۰ کیلو سپینه سره ووېشل شي.  
دا وېش لړۍ د کرنیزو چارو آمر، د ولایت د استخباراتو استازي، د کرنې ریاست سلاکار او د پلان او برنامو مدیر او د سټارز مؤسسې مسوولینو په حضور کې پرانیستل شوه. د کرنیزو چارو آمر بزګرانو ته لارښوونه وکړه، چې پسرلی او منی دواړه د کرکیلې وختونه دي، نو دا درکړل شوي غنم وکرۍ او له پلور یا خوړلو څخه یې ډډه وکړئ.  
بزګرانو د دې مرستو په ترلاسه کولو خوښي څرګنده کړه او د کرنې ریاست له همکارۍ څخه یې مننه وکړه.  
د یادونې وړ ده، چې، په روان ۱۴۰۳ کال کې په ټولیز ډول ۱۶زره او ۵۰۰ بزګرانو ته د غنمو اصلاح شوی تخم او کیمیاوي سره وېشل شوې ده.