هلمند کې د غنمو زېرمه کولو لړۍ بشپړه او مرکزي سیلو ته یې انتقال روان دی
۲۸ لېندۍ ۱۴۰۳ه.ش
۱۶ جُمَادَى الثاني۱۴۴۶ه.ق
د هلمند ولایت د کرنې، اوبولګولو او مالدارۍ ریاست د هڅو او د اړوندو کمېټو په ګډې همکارۍ، په مرکز لښکرګاه کې له بزګرانو څخه ۱زر او ۶۳۲ ټنه اضافي غنم پېرل شوي او د کرنې ریاست په ګدامونو کې په مسلکي ډول زېرمه شوي دي.
د ا.ا.ا زعیم عالیقدر، امیرالمؤمنین شیخ صاحب (حفظه الله تعالی) د حکم پر بنسټ، دغه غنم د لښکرګاه په درې ګدامونو کې د دې لپاره ساتل شوي چې د بحراني حالاتو، وچکالۍ یا طبیعي پېښو پر مهال د غنمو کمښت مخنیوی وشي.
په ورته وخت کې، مرکز کابل ته د ۴زر او ۲۳۶ ټنه غنمو د لېږد لړۍ د ځانګړې کړنلارې له مخې د ګډو کمېټو په حضور کې دوام لري، چې تمه ده ژر بشپړه شي.
د یادونې وړ ده چې سږ کال د ا.ا.ا زعیم عالیقدر امیرالمؤمنین حفظه الله د حکم له مخې په هلمند کې ټولټال ۵زره او ۸۶۸ ټنه اضافي غنم پېرل کېږي، چې له دې ډلې څخه ۱زر او ۶۳۲ ټنه په هلمند کې زېرمه شوي او پاتې ۴زره او ۲۳۶ ټنه کابل (مرکزي سیلو) ته لېږدول کېږي.
