کندز ته د کرنې وزارت د مالي او اداري مرستیالۍ د استازو سفر
۲۸ لېندۍ ۱۴۰۳ه.ش
۱۶ جُمَادَى الثاني۱۴۴۶ه.ق
د کرنې، اوبولګولو او مالدارۍ وزارت د مالي او اداري چارو مرستیالۍ استازي کندز ولایت کې د مازادو غنمو پېرودلو پروسې د ارزونې په موخه دغه ولایت ته د سفر په ترڅ کې له بزګرانو د مازادو غنمو د پیرودلو او معاینې کمیټو له استازو سره لیدنه وکړه.
په دغه کتنه کې د مالي او اداري مرستیالۍ استازی محبوب شاه شاه او ورسره مل پلاوي له خوا په دې ولایت کې له بزګرانو د اضافي غنمو د پیرلو پروسه کې د ګډو کمېټو لخوا د ترسره شویو کړنو څخه د مننې ترڅنګ په راتلونکي کې هم د لا زیاتو همکاریو غوښتنه وکړه. ښاغلي شاهد دغه پروسه ډېره مهمه یاده کړه او وې ویل، چې د عالیقدر امیرالمؤمنین حفظه الله په ځانګړي حکم د بزګرانو د حمایې او ملاتړ ترڅنګ به راتلونکي کې د هېواد په کچه زرګونه متریک ټنه خوراکي غنم ولرو ترڅو د ولسونو د اړتیا پر مهال د اسلامي امارت لخوا ورڅخه ګټه واخیستل شي.
وروسته د یادو کمیټو غړیو د ورغلي پلاوي ورتګ کندز ته مؤثر وباله او وې ویل، چې دغه پروسه به د وزارت مقام د لارښودنو مطابق لا ښه او منظمه پر مخ یوړل شي.
همدارنګه د کندز په ولایت کې د مازادو غنمو دپېرودلو ګډو کمیټو راغلي پلاوي ته ددغې پروسې د ښه پر مخ بیولو په اړه له خپله اړخه د بشپړې همکارۍ ډاد ورکړ، هغوی ددې پروسې پر شفافیت، د بزګرانو غوښتنو ته د رسیدنې، د ستونزو هوارولو او د مشرتابه د حکم د عملي تطبیق په برخه کې د هر راز مسؤلانه همکاریو ژمنه وکړه.
