د ننګرهار بټي کوټ کې د درېیو کانالونو د پاکولو چارې پیل شوې
د ننګرهار د کرنې، اوبو لګولو او مالدارۍ ریاست سره په همغږۍ د افغانستان لپاره د کلیو بیا ودانولو ادارې له لورې د بټي کوټ ولسوالی د چهاردي، اسد خېل او تکیه کلیو کې د درېیو کانالونو د پاکولو چارې پیل شوې.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل په یادو کانالونو کې چې ۲۶ کیلو متره اوږدوالي لري د پاک کارۍ چارې پیل شوي، چې سلګونه هېوادوالو ته پکي د کار زمینه برابره شوې ده.
ښاغلي محسن زیاته کړه د درې واړو کانالونو لاندې ۱۳ زره او ۸۰۰ جریبه کرنیزه ځمکه پرته ده، چې په پاک کارۍ سره به یې یاد ځمکو ته په کافي اندازه اوبه ورسېږي.
دیادو کانالونو په پاک کارۍ سره به کرنیز محصولات زیات، کورنۍ پرځان بسیا او د خوړو خوندیتوب به رامنځته شي.
