د ختیځ زون په کچه د ریفرینس لابراتوار جوړولو چارې پیل شوې
۳ تله ۱۴۰۳ه.ش
۲۱ رَبِیعُ الْأَوَّل ۱۴۴۶ه.ق
دختیځ زون په کچه د ۱.۲ میلیونه امريکايي ډالرو په لګښت د ریفرینس لابراتوار « يو پرمختللي لابراتوار» جوړولو چارې پيل شوې .
په هغه غونډه کې، چې په همدې موخه جوړه شوې وه، د ننګرهار مرستیال والي مولوي سعید احمد بنوري، د عامې روغتيا وزارت مرستیال مولوي عبدوالولي، د ننګرهار عامي روغتيا رییس مولوي آمين الله شريف، د ننګرهار کرنیز شرکت رییس سیدمحمد نعیم «محمدي» او يو شمېر نورو مسئولينو ګډون درلود.
دغه لابراټوار د ملګرو ملتونو د پراختیا پروګرام ۱.۲ میلیونه امریکایي ډالرو په لګښت د جلال آباد ښار شپږمه ناحیه کې جوړېږي
د دې طبي لابراتوار په جوړېدو سره به نه يواځې ختيځوال؛ بلکې ډېری نور هېوادوال به هم بهر ته له تګ څخه وژغورل شي او دلته به ورته د هر ډول لابراتواري معايناتو په وړيا ډول زمينه برابره شي.
د ياد لابراتوار د کار د پرانیستې پر مهال د ننګرهارولایتي ادارې د ګڼو رییسانو سربیره د«یو،ان،ډي،پي» چاراوکو او د رسنيو استازو هم حضور درلود.
