ننګرهار کې لسګونو مېرمنو سره د سبو د اصلاح شویو تخمونو او کرنیزو توکو مرسته وشوه
۶ وږی ۱۴۰۳ه.ش
۲۳ صَفَر المُظَفَّر ۱۴۴۶ه.ق
د ننګرهار دکرنې، اوبو لګولو او مالدارۍ ریاست د ملګرو ملتونو پراختیایي ادارې په مالي او د اکشن اېډ مؤسسې په تخنیکي همکارۍ د ننګرهار په لسو ولسوالیو کې ۲۵۰ تنو مېرمنو ته د سبو تولید او خوړو خوندیتوب په موخه دسبو اصلاح شوي تخمونه، کیمیاوي سرې او د کرنیزو توکو کڅوړې وېشلي دي.
د ننګرهار کرنې، اوبو لګولو او مالدارۍ رییس مولوي محمد ولي محسن وویل، چې د اکشن اېډ مؤسسې له لورې د ننګرهار په چپرهار، رودات، خوږیاڼي، کوټ، شېرزاد، اچین، لعلپوره، مومندره، سره رود او دره نور ولسوالیو کې د سیبارډ ال پروژې له لورې جوړو شوو بڼونو کې دسبو تولید په موخه ۲۵۰ مېرمنو سره د ۹ قلمه هایبرایډ اصلاح شوي تخمونو، کرنیزو وسایلو او کیمیاوي سرو مرسته وشوه.
ښاغلي محسن زیاته کړه، چې د هرې مېرمنې محرم ته د تورو بانجانو، رومیان، کاهو هایبرایډ تخمونه، کوداله، بېلچه، پنجي کش، سپینه او توره سره هم ورکړل شوه.
د اکشن اېډ سیبارډ پروژې وړاندې تردې هم د بڼوالو او بزګرانو سره د اصلاح شوي تخمونو، کیمیاوي سرو، بنوالۍ وسایلو او نورو اړونده برخو کې مرستې کړي دي.
