د ختیځ لبنیاتو فابریکې شته ستونزو حل په موخه ناسته ترسره شوه

د ننګرهار د کرنې، اوبولګولو او مالدارۍ ریاست تر چتر لاندې ختیځ لبنیاتو فابریکه کې د شته ستونزو حل په موخه د کرنې وزارت مسلکي مرستیالۍ سلاءکار مولوي طالب جان ذکي په مشرۍ راغلي پلاوي او د ننګرهار د کرنې، اوبولګولو او مالدارۍ رییس مولوي محمد ولي محسن د ختیځ لبنیاتو کوپراتیفونو مسؤلینو سره ناسته وکړه.
د دې غونډې په ترڅ کې، د ټولنې چارواکو او د ولسوالیو کوپراتیفونو استازو دخپلو فعالیتونو او لاسته راوړنو راپور وړاندې او دغه راز د تولیداتو، بازارموندنې، کوپراتیفونو ثبت، شېدو راټولولو او نورو برخو کې خپلې ستونزې او ننګونې شریکې کړې. 
په همدې حال کې دکرنې وزارت د مسلکي مرستیالۍ سلاءکار مولوي طالب جان ذکي د ختیځ لبنیاتو مسؤلینو ته د کوپراتیفونو ثبت، کړنلارې او ټولنې جوړولو په برخه کې معلومات وړاندې کړل.
نوموړی د چارواکو ټولنې ته وویل، چې د ختیځ لبنیاتو ستونزې او مشکلات به د کرنې وزارت مقام سره د حل په موخه شریکې او د شته ستونزو او ننګونو هوارولو په پار هلې ځلې کوي.