پکتیا کې پر سلګونو بزګرانو د سبو د تخمونو وېش لړۍ پیل شوه
د پکتیا دکرنې، اوبولګولو او مالدارۍ ریاست د افغانستان لپاره د ناورې کمېټې په همکارۍ ددې ولایت د مرکز ګردیز او احمدابا ولسوالی پر ۲۵۵ بزګرانو د سبو د اصلاح شویو تخمونو او کیمیاوي سرو وېش لړۍ پیل کړی دی.
د پکتیا دکرنې ریاست د چارواکو په خبره ددې پروسې له لارې پر یادو بزګرانو د بېلابېلو سبو؛ لکه « ګشنیز، پالک، سره ملۍ، کاهو، ګندنه او نیش پیاز» تخمونه او ترڅنګ یې توره او سپینه سره وېشل کېږي.
د پکتیا دکرنې ریاست د چارواکو په خبره پر دغو بزګرانو د سبو اصلاح شویو تخمونو او کیمیاوي سرو د وېش ترڅنګ دوی ته د سبو کرکیلي په برخه کې لازمې لارښوونې هم کېږي.
ددغو تخمونو او کیمیاوي سرو د وېش موخه د بزګرانو ملاتړ، د اصلاح شویو تخمونو دودول او په ټوله کې د سبو د تولیداتو زیاتول دي.
