پکتیا کې د غنمو ۲۵ ننداریزې قطعې جوړیږي

۱۶ تله ۱۳۹۸
پکتیا د کرنې، اوبولګولو او مالدارۍ ریاست لخوا ددې ولایت په مرکز او ټولو ولسوالیو کې د اصلاح شویو او سیمه ییزو غنمو ۲۵ ننداریزې مقایسوي قطعې جوړیږي.
په همدې موخه نن د پکتیا د کرنې، اوبولګولو او مالدارۍ په ریاست کې د ځانګړو مراسمو په ترڅ کې بزګرانو ته د غنمو اصلاح شوي تخم، توره او سپینه سره ووېشل شوه.
د وېش پر مهال د پکتیا د کرنې اوبولګولو او مالدارۍ رییس انجنیر محمد دین مومند وویل، د پکتیا د مرکز او ولسوالیو ۲۵ تنه مخکښو بزګرانو هر یوه ته ، لس کیلوګرامه د غنمو اصلاح شوی تخم، ۱۲ نیم کیلو ګرامه د غنمو محلي تخم، ۲۵ کیلو ګرامه توره سره او ۵۰ کیلو ګرامه یوریا سپینه سره او ددغو جوړېدونکو ننداریزو قطعو د کرکېلي او خشاوې لپاره هر بزګر ته دوه زره او ۴۰۰ افغانۍ ورکړل شوې.
ښاغلي مومند زیاته کړه، چې ددې ننداریزو قطعو له کرکېلي موخه داده چې له یوې خوا بزګرانو ته ددې ارزښت وښودل شي، چې اصلاح شوي تخمونه له نورو سیمه ییزو تخمونو څخه زیات حاصل ورکوي او له شیندلي بڼې څخه د کتار په ډول کرونده ښه پایله ورکوي او بل داچې بزګرانو ته د ننداریزو قطعو اهمیت ور وښودل شي، چې راتلوونکې کې همدا ډول کروندو ته مخه کړي.
په همدې حال کې له دغو مرستو څخه برخمن شوي بزګران خوښي څرګنده کړه، چې ورته دغنمو ننداریزې مقایسوي قطعې جوړیږي دوی د کرنې ریاست هڅې د یوې پرمختللې کروندې لپاره ګټورې وبللې.
دغه راز د پکتیا د کرنې ریاست د کرنیزو چارو امر مومند خروټي وویل، چې دیادو ننداریزو قطعو لپاره له وړاندې سروې ترسره شوې وه او په شرایطو برابره ځمکه ورته انتخاب شوې وه.
د یادونې وړ ده چې دغه ۲۵ ننداریزې قطعې په ۲۵ جریبه ځمکه کې جوړیږي.