د ننګرهار کانال شرکت کې په نږدې ۲۰ زره جریبه ځمکه د مالټو بڼونه جوړ شوي
۲۳ غویی ۱۴۰۳ه.ش
۳ ذوالقعده ۱۴۴۵ه.ق
د ننگرهار کانال شرکت چارواکي وايي، چې د یاد کانال په بېلابېلو سیمو کې نږدې په ۲۰ جریبه ځمکه د مالټو بڼونه جوړ شوي دي.
د ننګرهار کانال شرکت رییس مولوی غلام الرحمن کظیم وویل، چې د ننګرهار کانال شرکت د مالټې سږني حاصلات به د ټېر کال په پرتله ډېروي، دا په داسې حال کې ده، چې تېرکال د یاد کانال د مالټو حاصلات درې زره او ۲۰۰ مټریک ټنه ښودل شوې وه.
ښاغلی کظیم ددې کانال د مالټو د ډېرښت لاملونه د نوي بڼونو حاصل ته رسېدل او د مالټو بڼونو ښه پالنه وبلل.
د ننګر په ولایت کې د مالټو ډېر بڼونه شته او خلک په خپلو کورونو او کروندو کې د مالټې ونې اېښي دي او يا دمالټو بڼونه یې جوړ کړي دي، خو په تېرو څو کلونو کې د کرنې وزارت له خوا په دې ولایت کې د مالټو یوشمېر معیاري او سوداګریز بڼونه هم جوړ شوي دي.
د افغانستان ختیځ ننګرهار، لغمان او کونړ ولایتونه مدیتراني اقلیم او د مالټو، نارنج او لیمو بڼونو لپاره مناسبه هوا لري.
په ننگرهار کې د مالټو سربېره د کانال په ځمکو کې خرما، زیتون، غنم، جوار او نور کرنیز توکي هم کرل کېږي.
