ننګرهار کې پر ۶۲۷ هکتاره ځمکه ممپلي کرل شوی
٢۲ زمری ۱۴۰۲ه.ش
٢۶ مُحَرَّمُ الحَرام ۱۴۴۵ه.ق
د ننګرهار د کرنې، اوبولګولو او مالدارۍ ریاست د معلوماتو له مخي، د ننګرهار په ۱۱ ولسوالیو کې پر ۶۲۷ هکتاره ځمکه ممپلي کرل شوي .
د ننګرهار د کرنې، اوبولګولو او مالدارۍ رییس مولوي عبدالستار محمد وویل، چې سږ کال د ننګرهار په ۱۱ ولسوالیو «بهسود، هسکه مېنه، کوزکونړ، بټي کوټ، سپین غر، سره رود، خوږیانو، پچیراګام، چپرهار، شېرزاد، او حصارک» کې پر ۶۲۷ هکتاره ځمکه ممپلي کرل شوي .
تېرکال په ننګرهار کې پر ۲۴۰ هکتاره ځمکه ممپلي کرل شوې وه، چې ۵۱۶ مټریک ټنه حاصل ترې ترلاسه شوې وه.
دغه راز د ننګرهار د کرنې ریاست د کارکوونکو له لورې بزګرانو ته د ممپلیو ناروغیو، اوبولګولو، کرنیزو عملیو، بازارموندنې، سري ورکولو، حاصل ټولو کې عملي او نظري روزنه هم ور کړل شوې ده.
ممپلي دصنعتي او تيلې نباتاتو له ډلې یو له مهمو نباتاتو څخه دی، چې ننګرهاري بزګرانو یې د کرلو سره لیوالتیا زیاته شوي ده. تېر کال د ننګرهار په ۷ ولسوالیو کې ممپلي کرل شوی وه او سږ کال په ۱۱ ولسوالیو کې کرل شوې ده؛ چې سږکال به د تېر په پر تله څو برابره ډېر حاصل ورکړي .
