کندوز کې د خټکیو حاصلات ۱۵ سلنه زیات شوي
د کندز ولایت د کرنې، اوبولګولو او مالدارۍ ریاست وایي، چې سږکال په دې ولایت کې له ۵ زره او ۶۷۴ هکتاره للمي او اوبیزو ځمکو څخه ۱۰۹ زره او ۲۲۴ متریک ټنه خټکي راټوله شوي دي، چې د تېر کال په پرتله ۱۵ سلنه زیاتوالی ښيي.
چارواکي وايي، چې مناسبه زېرمه کول او بازار موندنه، په ځانګړې توګه د صادراتو په سکتور کې، د دې محصول د اقتصادي ارزښت په لوړولو کې مهم رول لوبوي.
د کندز کروندګر هم د خټکیو د حاصلاتو د زیاتوالي په اړه خوښي څرګندوي، خو ټینګار کوي چې حکومت باید د دوی د محصولاتو د بازارموندنې په برخه کې مرسته وکړي، څو د ښه او مناسبې بیې په بدل کې وپلورل شي.
کندز د «خربوزې ښار» په نوم پېژندل کېږي او د دې مېوې بېلابېلې نوعې پکې کرل او ترویج کېږي. له هغو څخه مشهوره یې عسقلاني، ارکاني، زرمتي، جینتور، قندک، اندلک، الهپوچاق، برگني سبزمغز او غازيخاني دي. د دغو ډولونو له ډلې، عسقلاني او غازيخاني زیات شهرت لري.
