کندهار کې نږدې ۸۰۰ قاچاقي پسونه ونیول شوه
۱۰ غبرګولی ۱۴۰۴ ه.ش
۳ ذُو الحِجَّةِ ۱۴۴۶ه.ق
د کندهار ولایت په سپین بولدک او ریګستان ولسوالیو کې د کرنې او مالدارۍ ریاست، امنیه قومندانۍ او سیمهییزو مسؤلینو په همغږۍ، د ۷۹۰ قاچاقي پسونو د ناقانونه انتقال مخه ونیول شوه.
د کندهار د کرنې، اوبولګولو او مالدارۍ ریاست د معلوماتو له مخې، د سپین بولدک او ریګستان ولسوالیو د کرنې او مالدارۍ مسؤلینو، د امنیه قومندانۍ د ویښو او بیداره مجاهدینو په همکارۍ، په یاده سیمه کې د څارویو د قاچاق پر ضد عملیات ترسره کړل، چې له مخې یې ۷۹۰ قاچاقي پسونه ونیول شوه.
د راپورونو له مخې، قاچاق کوونکو هڅه کوله، چې ۴۰۰ پسونه د سپین بولدک ولسوالۍ له لارې او ۳۹۰ پسونه د ریګستان ولسوالۍ د ریګ ایګریزي سیمې له لارې په ناقانونه ډول پاکستان ته انتقال کړي، خو د مسؤلو ادارو په وخت اقدام سره د قاچاق مخه ونیول شوه. په تړاو یې یو شمېر کسان نیول شوي او د قانوني څېړنو لپاره عدلي او قضايي ارګانونو ته سپارل شوي دي.
د کندهار د کرنې ریاست وایي، د لوی اختر د نږدې کېدو له امله، په سرحدي ولسوالیو کې د څارویو د قاچاق هڅې ډېرې شوي دي. د همدې موخې لپاره، د کرنې ریاست او امنیه قومندانۍ له لوري ګرځنده څارنې او وقایوي کمپاینونه پیل شوي، ترڅو د څارویو د قاچاق مخه ونیول شي.
یاد ریاست زیاتوي چې یوازې د تېرې یوې میاشتې په موده کې د زرګونو څارویو د قاچاق مخه نیول شوې او د قاچاق کوونکو پر وړاندې جدي چلند کېږي.
