کندهار کې د نباتي ناروغیو او آفتونو پر ضد هڅې؛ د بوټې ژغورنې مدیریت د لسګونو کروندګرو شپږ ډوله نباتات تشخیص کړي
۲۸ کب ۱۴۰۳ه.ش
۱۸ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د بوټې ژغورنې عمومي مدیریت د مسلکي انجنیرانو په مټ د تېرو دوو اوونیو په لړ کې د لسګونو کروندګرو ۶ ډوله مختلف نباتات د نباتي ناروغیو، آفتونو او وقایوي کنټرول لپاره تشخیص کړي دي، چې په یادو نباتات کې غنم، هوږه، توره زیره، پیاز، انځر او نارنج شامل دي.
د یادو بوټو د مختلفو ناروغیو او آفتونو د تشخیص لپاره کروندګرو د کندهار، هلمند، اروزګان او زابل ولایتونو څخه مراجعه کړې، څو د مسلکي او متخصص انجنیرانو له لوري یې د بوټو ناروغۍ په لابراتوار کې معاینه او تشخیص شي، چې تر تشخیص وروسته، د بوټو ژغورنې انجنیرانو کروندګرو ته د کنټرول اړینې سپارښتنې ورکړې، او ځینو بزګرانو ته د نباتاتو د درملنې لپاره نسخې هم چمتو شوې دي، ترڅو دوی اړوند کرنیز درمل وپېري. سربېره پر دې، یوشمېر کروندګرو ته په وړیا ډول افت وژونکي درمل هم وېشل شوي.
