کندهار د چرګانو د دانې په تولید کې ځانبسیاینې ته ورسېد؛ هره ورځ ۵۵۰ ټنه معیاري دانه تولیدېږي
۲۸ سلواغه ۱۴۰۴ه.ش
۲۹ شَعبان المُعَظّم ۱۴۴۷ه.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د مالدارۍ آمریت د معلوماتو او احصایې له مخې، په کندهار کې د ۹ فعاله تولیدي کارخونو له لوري په ورځني اوسط ډول ۵۵۰ ټنه د چرګانو دانه تولیدېږي.
د چارواکو په وینا، کندهار دا مهال د چرګانو د دانې په برخه کې پر ځان بسیا شوی او اړتیا نه لري، چې له نورو هېوادونو یا د هېواد له نورو ولایتونو څخه دانه وارد کړي. هغوی زیاته کړه، چې د کندهار تولیدي کارخونې د کیفیت او معیار له پلوه معیاري دانه تولیدوي، چې نه یوازې د ولایت اړتیاوې پوره کوي، بلکې شمالي، لوېدیځو او ختیځو ولایتونو ته هم صادرېږي.
د چارواکو په وینا، په وروستیو کلونو کې په کندهار کې د مالدارۍ سکتور د پام وړ پرمختګ کړی دی. دا مهال کندهار د هګیو، د چرګانو د غوښو او اړوندو خوراکي توکو په برخه کې پر ځان بسیا دی. همداراز، د چرګوړو په تولید کې شاوخوا ۷۰ سلنه اړتیا په خپله پوره کوي او هڅې روانې دي، چې په راتلونکو کلونو کې په دې برخه کې هم بشپړې ځانبسیاینې ته ورسېږي.
په تېرو کلونو کې د چرګانو د دانې یوه لویه برخه له نورو هېوادونو واردېده، چې له امله یې د تولید لګښتونه لوړ او د بازار بیې بېثباته وې. خو د خصوصي سکتور پانګونې، د تولیدي کارخونو زیاتوالي او د کرنې ریاست تخنیکي ملاتړ د دې لامل شوی، چې په هېواد کې د چرګانو د دانې کورنی تولید پراخ شي.
کارپوهان باور لري چې د چرګانو د دانې پر ځانبسیاینه نه یوازې د مالدارانو لګښتونه راکم کړي، بلکې د چرګانو د غوښو او هګیو بیې یې هم نسبي ثبات ته نږدې کړې دي. د یاد سکتور پیاوړتیا کولی شي د کارموندنې فرصتونه زیات او سیمهییز اقتصاد لا غښتلی کړي.
