کرنې وزارت کې د افغانستان دکرنې او مالدارۍ د پراختیا پروګرام د پېژندنې په پار غونډه دایره شوه
د افغانستان د کرنې او مالدارۍ د پراختیا پروګرام د پېژندنې په موخه، غونډه د کرنې، اوبو لګولو او مالدارۍ وزارت د پلان او پالیسۍ ریاست په تالار کې د دې پروګرام د تخنیکي کمېټې د غړو، رییسانو او سلاکارانو په ګډون ترسره شوه.
په پیل کې، د پلان او پالیسۍ رییس سید خالد صاحبزاده د کرنې او مالدارۍ د پراختیا پروګرام د پنځه کلن پلان د موخو او جزییاتو په اړه معلومات وړاندې کړل او له ګډونوالو څخه یې وغوښتل، چې د پروګرام د لا اغېزمن تطبیق او بډاینې په موخه خپل نظریات او وړاندیزونه شریک کړي.
وروسته د پلان جوړونې برخې متخصصینو د ملي ستراتیژۍ د منځپانګې په اړه پرزینټېشنونه وړاندې کړل. له دې وروسته، ګډونوالو د څېړنې، ترویج، اوبو لګولو، زیربناوو، سړو خونو، سیلوګانو، زېرمه تونونو، بڼوالۍ او د کرنې د میکانیزه کولو په برخو کې خپل نظریات او وړاندیزونه څرګند کړل.
د یادونې وړ ده، چې د افغانستان د کرنې او مالدارۍ د پنځه کلنې ملي پراختیا ستراتیژي د ۱۴۰۵ څخه تر ۱۴۰۹ هجري لمریز کلونو پورې په بېلابېلو برخو کې تدوین شوې او تمه ده، چې له راتلونکي کال څخه د هېواد د کرنیزې ځان بسیاینې د موخو د ترلاسه کولو لپاره عملي شي.
