کابل کې د نیالګیو کېنولو پسرلنی ملي کمپاین پیل شو

۱۷ کب ۱۴۰۴ه‍.ش
۱۹ رَمَضانُ المُبارَک ۱۴۴۷ه‍.ق
د تخنیکي او مسلکي زده کړو ادارې په انګړ کې د کابل ولایت د کرنې، اوبو لګولو او مالدارۍ ریاست له لوري د ۱۴۰۵ هـ.ل کال د نیالګیو کېنولو پسرلنی ملي کمپاین د یو لړ مراسمو په ترڅ کې پیل شو.
په دغو مراسمو کې د کابل ولایت والي الحاج ملا امین الله عبید، د کابل د کرنې، اوبو لګولو او مالدارۍ رییس مولوي محراب الدین بلال، د تخنیکي او مسلکي زده کړو ادارې تخنیکي مرستیال مولوي غلام سعید احساس او یو شمېر نورو چارواکو ګډون کړی و.
په پیل کې د کابل ولایت د کرنې، اوبو لګولو او مالدارۍ رییس مولوي محراب الدین بلال د نیالګیو کېنولو پر ارزښت خبرې وکړې او ویې ویل، چې د هېواد د زرغونتیا او د چاپېریال د ساتنې لپاره د نیالګیو کېنول ډېر مهم دي. نوموړي زیاته کړه، چې د نیالګیو ساتنه او پالنه هم د ټولو ادارو او خلکو ګډ مسؤلیت دی او باید ورته جدي پاملرنه وشي.
ورپسې د کابل والي الحاج ملا امین الله عبید وویل، چې د چاپېریال ساتنه او د ښار زرغونتیا د ټولو دولتي ادارو او ولسونو ګډ مسؤلیت دی. هغه د کابل له اوسېدونکو وغوښتل، چې د نیالګیو کېنولو تر څنګ د هغوی په ساتنه او پالنه کې هم فعاله ونډه واخلي.
همدارنګه د تخنیکي او مسلکي زده کړو ادارې تخنیکي مرستیال مولوي غلام سعید احساس د نیالګیو کېنولو دیني، چاپېریالي او ټولنیزو ګټو ته اشاره وکړه او ټینګار یې وکړ چې د هېواد د زرغونتیا او د سالم چاپېریال د رامنځته کېدو لپاره باید ټول خلک د نیالګیو کېنولو او ساتنې ته ځانګړې پاملرنه وکړي.
دا په داسې حال کې ده، چې څو ورځې وړاندې د کرنې، اوبو لګولو او مالدارۍ وزارت له لوري د «نیالګي کېنول، صدقه جاریه ده» تر شعار لاندې د نیالګیو کېنولو پسرلنی ملي کمپاین د کابل په بادام‌باغ کې په رسمي ډول پیل شوی و، چې موخه یې د چاپېریال زرغونتیا، د طبیعي سرچینو ساتنه او په هېواد کې د ونو کېنولو فرهنګ پیاوړتیا بلل شوې ده.