پکتیکا کې د جوارو ۴۰ ننداریزو کروندو جوړولو لپاره د اصلاح شوي تخم وېش
۱۰ غبرګولی ۱۴۰۴ ه.ش
۳ ذُو الحِجَّةِ ۱۴۴۶ه.ق
د پکتیکا د کرنې، اوبولګولو او مالدارۍ ریاست له لوري د کرنیزو فعالیتونو د پراختیا په موخه، د جوارو ۴۰ ننداریزو کروندو جوړولو لپاره د تېرې پنجشنبې او روانې شنبې په ورځ د ولایت مرکز او پنځو ولسوالیو کروندګرو ته اصلاح شوی تخم او سره ووېشل شوه.
د پکتیکا ولایت د کرنې، اوبولګولو او مالدارۍ ریاست په نوښت، د جوارو ۴۰ ننداریزې کروندې د ولایت په مرکز او پنځو ولسوالیو کې جوړېږي. د کرنې ریاست د معلوماتو له مخې د دغو نمایشي قطعو د جوړولو لپاره هر ګټهاخیستونکي ته ۸ کیلو ګرامه اصلاح شوی د جوارو تخم، ۳۰ کیلو ګرامه توره سره او ۵۰ کیلو ګرامه یوریا ورکړل شوه.
همداراز، کروندګرو ته د کتاري کرنې پر اهمیت لازمې تخنیکي لارښوونې هم ورکړل شوې، څو له نوې کرنیزې طریقې څخه اغېزمنه ګټه پورته کړي.
د دې برنامې اساسي موخه د جوارو د حاصل زیاتول، کروندګرو ته د اصلاح شويو تخمونو معرفي کول او د عصري کرنې ترویج دی، ترڅو د پکتیکا کروندګر له نوې کرنیزې تجربې ګټه واخلي.
