پکتیا کې سلګونو بڼوالو سره د بڼوالۍ اړوند توکو مرسته وشوه
۸ غویی ۱۴۰۵ه.ش
۱۱ ذُو ٱلْقَعْدَةِ ۱۴۴۷ه.ق
د پکتیا د کرنې، اوبولګولو او مالدارۍ ریاست په همغږۍ د اړیکو دفتر له لوري د دې ولایت په روحاني بابا او زرمت ولسوالیو کې پر ۴۴۹ بڼوالو د بڼوالۍ اړوند توکي ووېشل شول.
د وېش په مراسمو کې د پکتیا د کرنې، اوبو لګولو او مالدارۍ ریاست اړوند د کرنیزو چارو آمر عبدالله حلیم زي وویل، چې له دې ډلې ۲۱۰ تنه بڼوال په روحاني بابا ولسوالی او ۲۳۹ تنه نور په زرمت ولسوالی کې له یادو مرستو څخه برخمن شوي دي.
همداراز ښاغلي حلیم زي وویل، چې په وېشل شوو توکو کې د هر بڼوال لپاره د مڼو راټولولو ۱۰ دانې سانچې او د میوه لرونکو ونو د شاخهبرۍ د اسانتیا په موخه یوه ۴ متره المونیمي زینې شاملې وې. دا توکي د مېوو د راټولولو او د ونو د سمې پالنې په برخه کې له بڼوالو سره مهمه مرسته کوي.
د دې مرستې اساسي موخه د دودیزې بڼوالۍ پر ځای د عصري بڼوالۍ ترویج او پراختیا، د کرنیزو محصولاتو د تولید او کیفیت لوړول، او بڼوالو ته په دې برخه کې د لا زیاتو اسانتیاوو برابرول دي.
