پکتیا کې د عشر او زکات کارکوونکو ته ۱۵ موټرسایکیلونه ووېشل شول
۱۲ وری ۱۴۰۵ه.ش
۱۴ شَوّالُ المُکَرَّم ۱۴۴۷ه.ق
د پکتیا ولایت د کرنې، اوبو لګولو او مالدارۍ ریاست په چوکاټ کې د عشر او زکات کارکوونکو ته د چارو د لا اغېزمن تطبیق او د ولسوالیو مدیرانو د کاري اسانتیاوو او پیاوړتیا په موخه، د کرنې، اوبو لګولو او مالدارۍ وزارت مقام اړوند د عشر او زکات لوی ریاست له لوري ۱۵عرادې موټرسایکیلونه ووېشل شول.
د یادو موټرسایکیلونو په ورکړې سره به د ولسوالیو اړونده چارواکي وکولای شي خپلې کاري چارې په چټکۍ، اسانۍ او ښه همغږۍ سره ترسره کړي. همدا ډول د یادو وسایطو پر مټ به د عشراو زکات راټولول، څارنې او تنظیم چارې لا منظمې او اغېزمنې شي، همدا شان مسؤلین به وکولای شي، چې لرو پرتو سیمو او کلیو ته په اسانه سره تګ راتګ وکړي.
همدارنګه د دغو موټرسایکیلونو په مرسته به د ولسوالیو مدیران وکولای شي له بزګرانو، مالدارانو او د سیمې له اوسېدونکو سره نېغ په نېغه اړیکې ټینګې کړي، د عشراو زکات اړوند پوهاوی به زیات کړي او د عشراو زکات محصولاتو راټولولو بهیر به په منظم او اغېزمن ډول پر مخ یوسي.
د پکتیا ولایت کرنې، اوبو لګولو او مالدارۍ ریاست رهبري، د عشر او زکات آمرین او د ولسوالیو مدیران د کرنې، اوبو لګولو او مالدارۍ وزارت مقام او د عشراو زکات لوی ریاست له دوامداره ملاتړ او پاملرنې څخه مننه څرګندوي او ډاډ ورکوي، چې له ورکړل شویو امکاناتو څخه به په مسؤلانه او اغېزمن ډول ګټه پورته کړي، تر څو د عشر او زکات راټولولو او تنظیم بهیر لا پیاوړی او منظم شي.
د یادونې وړ ده، چې دغه ډول اسانتیاوې به نه یوازې د کارکوونکو د کاري وړتیاوو او مورال په لوړولو کې مهم رول لري، بلکې د خدمتونو د کیفیت ښه والي او د چارو د لا چټکتیا لامل به هم وګرځي.
