پکتيا: پر ۱۴۲۰۰ بزګرانو د غنمو د اصلاح شويو تخمونو او کيمياوي سرو د وېش لړۍ پيل شوه
د پکتيا ولايت د کرنې، اوبولګولو او مالدارۍ رياست اړوند د همکارو پاملرنې او د افغانستان لپاره د ناروې کمېټې په همکارۍ او د خوړو نړۍوال پروګرام په مالي ملاتړ ددې ولايت د مرکز ګردیز په ګډون ټولو ولسواليو پر ۱۴۲۰۰ اړمنو بزګرانو د غنمو د اصلاح شويو تخمونو او کيمياوي سرو د وېش لړۍ پيل شوه.
په يادو مراسمو کې د پکتیا د کرنې، اوبولګولو او مالدارۍ رياست رییس مولوي سید امین هاشمي، د کرنیزو چارو آمر عبدالله حلیمزی، د همکارو مؤسسو مسئولینو، بزګرانو او قومي مشرانو ګډون کړی وو.
ښاغلي حلیمزی ګډونوالو ته د ښه راغلاست ترڅنګ د همکارو موسسو څخه مننه وکړه او بزګرانو ته یي وویل، چې هڅه وکړئ یاد اصلاح شوی تخمونه په خپلو ځمکو کې وکرئ تر څو ښه حاصل ترلاسه کړئ.
د کرنې، اوبو لګولو او مالدارۍ رییس ښاغلي هاشمي په خپلو خبرو کې وويل، چې د ياد پروګرام له لارې هر بزګر ته ۵۰ کيلو اصلاح شوي غنم، ۵۰ کيلو توره سره او ۵۰ کيلو ګرامه سپينه سره په وړيا ډول ورکول کېږي.
ښاغلی هاشمي زياته کړه، چې د ياد پروګرام له تطبيق څخه يې موخه د اړمنو بزګرانو پر پښو اودرول دي، نوموړي له بزګرانو وغوښتل، چې پر خپلو ځمکو يې وکري، ترڅو اقتصادي وضعيت يې ښه شي.
د یادولو وړ ده، چې په نږدې ورځو کی د لس زره شاوخوا نور بزګران سروې هم وشي او د غنمو اصلاح شوی تخمونه او کیمیاوی سرې به ورته ورکړل شي.
