په کندهار کې د کرنې وزارت مرستیال بزګرانو ته: د کرنې وزارت ژمن دی، چې تاسو سره هر اړخیزې همکارۍ وکړي
![معین آبیاری و منابع طبیعی به دهقانان در قندهار: وزارت زراعت متعهد است که با شما همکاری همهجانبه کند](https://www.mail.gov.af/sites/default/files/2021-01/whatsapp_image_2021-01-14_at_12.41.42_pm_1.jpeg)
۲۵ مرغومې ۱۳۹۹
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال حشمت الله غفوري، کندهار ولایت ته دخپل سفر په ترڅ کې ددې ولایت له یوشمېر کروندګرو، بڼوالو او مالدارانو سره وکتل او له دوی سره د یادو برخو پر وروستیو فعالیتونو، ستونزو او ننګونو هر اړخیزې خبرې وکړې.
په دې ناسته کې د کندهار ولایت د کروندګرو، بڼوالو او مالدارانو استازو په خپل وار سره ددې ولایت دکرنې، بڼوالۍ او مالدارۍ په برخه کې د کرنې وزارت د کړنو قدرداني وکړه او ترڅنګ یې ددې ولایت د کرنې، بڼوالۍ او مالدارۍ په برخه کې خپلې ستونزې او ننګونې د کرنې وزارت مرستیال سره شریکې کړې او شته ستونزو ته د حل لارې او په یادو برخو کې د کرنې وزارت د لاډېرې پاملرنې غوښتونکي شول.
په همدې حال کې د کرنې وزارت د اوبولګولو او طبیعي سرچینو مرستیال حشمت الله غفوري د کروندګرو، بڼوالو او مالدارانو د استازو د غوښتنو او ستونزو تر اورېدو وروسته وویل، د کرنې وزارت ژمن دی، چې د وزارت امکاناتو ته په کتو ددې ولایت د کرنې او مالدارۍ په سکټورونو کې شته ستونزې تر یوې کچې هوارې او د یادو سکټورونو د لاپیاوړتیا په پار له تاسو سره هر اړخیزې همکارۍ وکړي.