په ننګرهار کې سلګونه مالدارانو ته د شېدو پاک ساتلو لوښي ورکړل شول
د ننګرهار کرنې، اوبو لګولو او مالدارۍ ریاست په همغږۍ، د افغانستان لپاره د هالینډ کمېټې په تخنیکي او د اروپایي ټولنې په مالي ملاتړ، ۳۰۰ مالدارانو ته د شېدو ټولولو او لیږدولو لوښي ورکړل شول.
د ننګرهار کرنې، اوبو لګولو او مالدارۍ رئیس، مولوي محمد ولي محسن، وویل چې په سره رود، کوز کنړ او بهسودو ولسوالیو کې ۳۰۰ مالدارانو ته د شېدو ساتلو لپاره لسلیتره لوښي توزیع شول.
ښاغلي محسن زیاته کړه چې د دې لوښو وېش موخه، د شېدو پاک او صحي ساتنه او له یو ځایه بل ځای ته په درست او صحي طریقه انتقالول دي.
د افغانستان لپاره د هالینډ کمېټه هر کال زرګونو مالدارانو سره په بېلابېلو برخو کې مرستې کوي.
