۵ وږی ۱۳۹۹

د پروان په ولایت نږدې یوه میاشت مخکې دکرنې وزارت د کرنیزو محصولاتو مدیریت د برنامې په اډاه کې د ۴۳۳ نویو کرنیزو پروژو چارې پیل شوې، چې تر دې دمه یې رغنیزې چارې نږدې ۴۰ سلنه بشپړ شوي دي.

د پروان دکرنې رییس عبدالوهاب خیرزاد په دې هلکه وایي: «د کرنیزو محصولاتو مدیریت د پروژې په اډانه کې د پروان ولایت په ټولو ولسوالیو کې ۴۳۳ کرنیزې پروژې پلي کیږي. په دغو پروژو کې د پیازو او کچالو زېرمتونونه، ممیزخونې او د مېوو لپاره سړې خونې جوړول او دغه راز د مېوو او سبو وچوونکي لمریز دستګاوې وېشل شامل دي، چې چارې یې له ۳۵ تر ۴۵ سلنه بشپړ شوي دي.»

ددې ولایت تر کار لاندې پروژو کې ۱۵۲ ممیزخونې، د پیازو ۲۰۴ او د کچالو ۳۵ زېرمتونونه او د مېوو ۱۲ سړې خونې جوړول او دغه راز د مېوو او سبو ۳۰ لمریز وچوونکي دستګاوې وېشل شامل دي.

په همدې حال کې هغه بڼوال او بزګران، چې له یادو نویو پروژو څخه برخمن کیږي. د خپلو عوایدو زیاتوالي او محصولاتو د خوڅاکېدو د مخنیوي په پار خوښ دي او وایي، چې سږکال به د دوی محصولات په مناسب وقت او مناسبه بیه خرڅ شي.

د پروان ولایت د مرکز اړوند د لغماني د سیمې اوسدونکی محمدحنیف، چې دکرنې وزارت له خوا ورته ممیزخونه جوړیږي واي: «یو من انګور مو په ۱۰۰ افغانۍ خرڅول، اوس چې موږ ته ممیزخونه جوړیږي، کولای شوچې په مناسبه بیه یې خرڅ کړو، یو من ممیز په ۱۰۰۰ افغانۍ خرڅوو. مخکې مو له ۳۰۰ تاکونو څخه ۴۰ زره افغانۍ پیسې ګټل، اوس چې ممیزخونه راته جوړیږي، د خرڅلاو کچه به مو ۱۰۰ زره افغانیو ته ورسیږي.»

په ورته وخت کې د پروان ولایت د «توپ درې» د نواباد د کلي ملک حاجي نصرالله وایي، خلک دې ته ژمن دي، چې نوي کرنیزې پروژې په سمه توګه پلي کړي. هغه وویل: «دولت سره زموږ ژمنه داده، چې پروژې په سمه توګه پلي کړو، دغه پروژې د بڼوالو او بزګرانو د ژوند په بدلون کې ستر رول لري، ځکه چې بڼوال او بزګران بېوزلي دي، یادې پروژې کولای شي، چې له اقتصادي اړخه د دون ژوند بدل کړي.