هلمند کې ۶۵ بېوزلو کورنیو ته د شیدو وزې وېشل کېږي
۲۷ مرغومې ۱۴۰۳ھ.ش
۱۶ رَجَب المُرَجَّب ۱۴۴۶ه.ق
د هلمند ولایت کرنې، اوبولګولو او مالدارۍ ریاست د افغانستان لپاره د هالینډ کمېټې په مالي ملاتړ د ناوې، مارجې او ګرمسیر ولسوالیو پر ۶۵ بېوزلو کورنیو د شیدو وزې او د څارویو خوراکه وېشي.
د مالدارۍ او د څارویو روغتیا آمر، حافظ هدایت الله "هدایت"، له هغو وزو لیدنه او ارزونه وکړه، چې په راتلونکي کې به مستحقو کورنیو ته ووېشل شي. ښاغلي هدایت د لیدنې پر مهال سپارښتنه وکړه، چې دغه وزې باید د ۱۵ ورځو لپاره کرنتین شي ترڅو د ناروغیو او روغتیا په اړه یې ډاډ ترلاسه شي.
د یادو کورنیو د ټاکلو او وېش چارې د ګډو کمېټو لخوا په روڼ او شفاف ډول ترسره کېږي، ترڅو مرسته یوازې مستحقو او اړمنو کورنیو ته ورسیږي.
دا اقدام د بېوزلو کورنیو د اقتصاد د پیاوړتیا او د هغوی لپاره د دوامداره عاید رامنځته کولو په موخه ترسره کېږي.
