هلمند کې له جوارو د څارویو د خوراکي توکو د تولیدي فابریکې چارې پراخیږي

۱۶مرغومې ۱۳۹۹
د هلمند د کرنې، اوبولګولو او مالدارۍ ریاست په هلو ځلو د افغانستان پراختیا ملي اداره غواړي، چې په دې ولایت کې له جوارو د څارویو د خوراکي توکو «سایلج» جوړولو په برخه کې خصوصي سکټور سره مالي او تخنیکي مرستې وکړې.
د هلمند دکرنې رییس زلمی الکو وایي، چې په دې وروستیو کې د هلمند دکرنې ریاست په هلو ځلو د خصوصي سکټور له لارې له جوارو او د جوارو له بوټو(کړبو) څخه د څارویو د خوراکي توکو «سایلج» جوړولوچارې په ازمایښتي ډول پیل شوي دي، چې اوس د خصوصي سکټور په ملاتړ سره غواړي، چې ددې ولایت د مالدارانو اړتیاوو پوره کولو لپاره د سایلج جوړولو چارې پراخې کړي.
ښاغلی الکو وایي، چې هلمند هر کال زرګونه ټنه جوار تولیدوي، ددې لپاره چې د جوارو لپاره د بازارموندنې زمینه برابره او د څارویو د اړتیا وړ خوراکي توکي چمتو شي، د هلمند دکرنې ریاست غواړي، چې په دې ولایت کې د سایلج فابریکه پیاوړې کړي.
د یادې فابریکې له لارې د هلمندي مالدارانو مالونو لپاره باکیفیته خواراکي توکي برابریږي او ترڅنګ یې نورو ولایتونو ته به یې هم د لېږد زمینه برابره شي، چې د نورو ګټو ترڅنګ یوشمېر کسانو ته په کې د کار زمینه هم برابریږي.
د هلمند دکرنې ریاست هلې ځلې کوي، چې ددې ولایت د مالدارۍ د پراختیا په پار مالدارانو ته اړینې اسانتیاوې برابرې کړې، ترڅو د بزګرانو او مالدارانو د عوایدو کچه لوړ او اقتصادي وضعیت یې ورسره ښه شي.