هلمند کې د مالټې بڼونه او حاصلات ډېر شوي

۹ لړم ۱۳۹۸
د هلمند ولایت د کرنې، اوبولګولو او مالدارۍ ریاست وایي چې، په دې وروستیو کلونو کې په دې ولایت کې د سټروسو د کورنۍ «مالټې، نارنج او لیمو» بڼونه او حاصلات ډېر شوې او مخ پر وده روانه ده.
د هلمند د کرنې رییس زلمی الکو وایي: «د هلمند خاوره اوبه او هوا د نارنج، مالټې، املوک، لیمو او ناکو پالنې او روزنې ته مناسبه، ده په همدې موخه په پام کې لرو چې د کوکنارو د ښه بدیل په توګه د یادو مېوو بڼونه ځمکوالو ته ور وپېژنو او ترویج یې کړو.»
ښاغلي الکو وویل په دې برخه کې د نمونې په ډول نږدې ۱۰ جریبه ځمکه کې په توافقي ډول د لیمو او مالټو بڼونه جوړ شوي دي چې تر ډېره یې ښه پایله ورکړې ده.
د هغه په خبره د هلمند دکرنې ریاست په پام کې لري، چې د کرنې وزارت د بڼوالۍ اومالدارۍ ملي برنامې په همکارۍ سږکال هم ددې ولایت په ۲۰ جریبه ځمکه کې د لیمو او مالټو بڼونه جوړ کړي.
د هلمند دکرنې ریاست تمه لري، چې په دې ولایت کې د سټروسو کورنۍ لا ډېر پراخه شي.
د سټروسو د کورنۍ ډېر بڼونه د هلمند ولایت په مرکز لښکرګاه او ددې ولایت په ناوې او نادعلي ولسوالیو کې دي.