هلمند کې د لړمانو روزنې بل ستر فارم جوړ شو
۱۶لېندۍ ۱۳۹۸
د هلمند دکرنې، اوبولګولو او مالدارۍ ریاست وایي، چې په دې ولایت کې د لړمانو روزنې بل ستر فارم چې د ۶۰ زره لړمانو او ۱۰۰ کربوړو د روزنې وړتیا لري، پرانیستل شوه.
دغه فارم چې د خصوصي سکټور له خوا جوړه شوې ده، د هملند د کرنې ریاست له خوا ور سره په بېلابېلو برخو کې هر اړخیزې مرستې او همکارۍ کیږي. دغه فارم د ۶۰ زره لړمانو د روزنې وړتیا لري او په دې فارم کې اووه ډوله لړمان روزل کیږي. ددې ترڅنګ په دې فارم کې به کربوړې هم وروزل شي.
د هلمند د کرنې رییس زلمی الکو وایي، چې ددې ولایت د کرنې ریاست دیاد فارم د پرمختیا په پار د فارم شته ستونزې او غوښتنې راټولې او په فني توګه یې دوی ته لازمې لارښوونې کړي دي.
د فارم چارواکي وايي، چې دا فارم ددې ولایت څخه د لړمانو د قاچاق د مخنیوي په موخه جوړه شوې ده.
له لړمانو څخه تر لاسه کېدونکي زهر یو شمېربهرنیو هېوادونو ته صادریږي.
د لړمانو خوراکه چنجي دي او هر لړم درې میاشتو کې شپږ څاڅکي زهر تولیدوي، چې د یو کیلو زهرو بیه نږدې یو میلیونه ډالرو ته رسیږي.
دا په هلمند کې د لړمانو روزنې دویم ستر فارم دی. تر دې وړاندې هم په دې ولایت کې د لړمانو روزنې یو فارم جوړ شوی، چې ۱۷ زره لړمان په کې روزل کیږي.
باید وویل شي، چې د لومړي ځل لپاره په هرات کې د لړمانو یو فارم جوړ شو، چې په هېواد کې د لړمانو د ساتلو او زهرو د تولید لومړنی فارم دی. د هرات د لړمانو په فارم کې له دوه زرو زیات لړمان ساتل کېږي، او له دغو لړمانو څخه تر لاسه کېدونکي زهر یو شمير بهرنیو هيوادونو ته صادرېږي.
