ننګرهار کې د نارنج ګل تر سرلیک لاندې ملي او نړۍوال نندارتون پرانیستل شو
په جلالاباد ښار کې د نارنج ګل تر سرلیک لاندې درې ورځنی ملي او نړۍوال نندارتون د وطني تولیداتو د معرفي کولو، د سوداګرو ترمنځ د اړیکو د پیاوړتیا او سیمهییز اقتصاد د ودې په موخه پرانیستل شو. په نندارتون کې ۱۲۰ غرفو کې بېلابېل محصولات وړاندې شوي او د هېوادوالو له تود هرکلي سره مخ شوی دی.
د ننګرهار د صنعت او سوداګرۍ ریاست تر چتر لاندې، د سيکارام احمدي بازار موندنې شرکت، ای او ایم مؤسسې او پيمان ګروپ په همکارۍ، د سراجالعمارت بڼ کې د نارنج ګل تر نوم لاندې درې ورځنی نندارتون پرانیستل شو.
په دغه نندارتون کې د ننګرهار وادي کرنیز امارتي شرکت په ګډون ګڼ شمېر داخلي شرکتونو خپل بېلابېل تولیدات نندارې ته وړاندې کړي دي، چې د هېوادوالو له تود هرکلي سره مخ شوي دي.
په نندارتون کې د ۱۲۰ غرفو له لارې داخلي تولیدات، صنعتونه، لاسي صنایع، خوراکي توکي او کلتوري ارزښتونه نندارې ته وړاندې شوي دي.
د نندارتون اصلي موخې د وطني تولیداتو معرفي، د خصوصي سکتور ترمنځ د اړیکو پراخېدل، او د سیمهییز اقتصاد وده ښودل شوې ده.
د افغانستان په بېلابېلو ولایتونو کې د ورته نندارتونونو جوړول داخلي تولیداتو ته د بازار پیدا کولو، ملي کلتور ودې او خصوصي سکتور ته د پانګونې زمینه برابرولو په موخه جوړېږي. تمه کېږي چې دا ډول نندارتونونه به د سوداګرۍ، پانګونې او فرهنګي ارزښتونو د پراختیا لپاره مثبتې پایلې ولري.
