ننګرهار کې د بېرې ونو کرلو سره د بېرې شاتو تولید او مینه وال زیات شوي
۲۵ کب ۱۴۰۴ه.ش
۲۷ رَمَضانُ المُبارَک ۱۴۴۷ه.ق
د ننګرهار ولایت کې د بېرې ونو د کرلو له امله د بېرې شاتو تولید او د دې طبیعي محصول مینه وال په زیاتېدو دي. د کرنیزو مسؤلینو په وینا، د بېرې ونې نه یوازې د شاتو د تولید لپاره ارزښت لري، بلکې د هغې مېوې او پاڼې هم بېلابېلې روغتیايي او اقتصادي ګټې لري.
د معلوماتو له مخې، د ننګرهار وادي کرنیز ـ امارتي شرکت په خپلو څلورګونو فارمونو کې د بېرې ګڼ شمېر ونې کرلي دي. همدارنګه د همدې شرکت تر څنګ یو شمېر نورو کرنیزو شرکتونو هم د بېرې ونې کرلي، چې د شاتو د مچیو د روزنې لپاره مناسبه فضا برابروي.
سربېره پر دې، په دې ولایت کې یو شمېر هېوادوال د شاتو د مچیو په روزنه او پالنه بوخت دي. دا کار نه یوازې د کرنې د سکتور د ودې لپاره مهم ګڼل کېږي، بلکې د کورنیو د اقتصاد په پیاوړتیا کې هم مهم رول لري.
کارپوهان وایي، شات د انسان د روغتیا لپاره یو ډېر ګټور او ارزښتناک طبیعي نعمت دی، ځکه نو اړتیا ده چې د شاتو تولید ته لا زیاته پاملرنه وشي. د شاتو د تولید د زیاتوالي لپاره د مچیو روزنه او پالنه اړینه ده او د بېرې ونو کرل هم ځانګړی اهمیت لري، ځکه د دې ونو ګلان د شاتو مچیو ته مناسبه غذا برابروي.
د کرنې وزارت چارواکي وايي، چې د بېرې ونو د کرلو او د شاتو مچیو د روزنې د پراختیا له لارې به په ننګرهار کې د بېرې شاتو تولید لا زیات شي او دا سکتور به د خلکو د عاید او د کرنیز اقتصاد د پیاوړتیا لپاره لا ډېر اغېزمن تمام شي.
