ننګرهار د سبو او مېوو د کرکېلې او تولید غوره ځای

۳۰ مرغومې۱۳۹۹
ننګرهار يو له سرسبزو ولايتونو څخه دى، او ډېرى خلک يې په کرنه او مالدارۍ بوخت دي، ددې ولایت په ډېرۍ ولسواليو کې اوبه پرېمانه دي نو په همدې موخه د ننګرهار په ولایت کې بېلابېل غلې دانې او سابه لکه بادرنګ، روميان، پياز، تورۍ، بېنډۍ، کدو، ګلپي، مولۍ، الو، کچالو، غنم، وريجې، جوار، ږدن، وربشې او داسې نور کرل کېږي او ښه حاصل ورکوي.
د ننګرهار دکرنې، اوبولګولو او مالدارۍ ریاست چارواکي وایي، چې ددې ولایت بزګران د نورو سبو ترڅنګ بېنډۍ هم کري او ښه حاصل ترې تر لاسه کوي.
د چارواکو په وینا د یاد ولایت په نږدې ټولو ولسوالیو کې د بېنډیو کرکېله کېږي او ددې ولایت ډېر شمېر بزګران د بېنډیو په کرکېله او تولید بوخت دي.
د کرنې وزارت د احصایې ریاست د ۱۳۹۸ یم کال شمېرې ښیي، چې د یاد ولایت په ۱۶۶ هکټاره ځمکه بېنډۍ کرل شوي وې چې د حاصلاتو د تولید کچه یې یوزر او ۹۹۲ مټریک ټنو ته ورسېد. که څه هم په ۱۳۹۹یم کال کې ددې ولایت د بېنډیو د کروندو او حاصلاتو کره شمېره تر دې دمه نشته خو د اټکل له مخې د تېرکال په پرتله یې حاصلات زیات دي.
د ننګرهار د کرنې ریاست چارواکي وایي، چې په دې ولایت کې د کرنیزو حاصلاتو د ډېرښت او د موسمي نباتاتو د ودې او تولید لپاره هلې ځلې کوي تر څو د یاد ولایت د کروندګرو عواید لوړ او یاد ولایت د سبو په برخه کې پرځان بسیا کړي.