ننګرهار ته د کرنې وزارت د پلان د لوی رییس په مشرۍ د پلاوي سفر
۲۰ سلواغه ۱۴۰۴ه.ش
۲۱ شَعبان المُعَظّم ۱۴۴۷ه.ق
د کرنې، اوبولګولو او مالدارۍ وزارت د پلان او برنامو د همغږۍ لوی رییس، مولوي عبدالغفور د خپل مل پلاوي سره ننګرهار ولایت ته دخپل سفر په ترڅ کې د یاد ریاست له رییس مولوي عبدالستار اخندزاده سره وکتل.
په دې لیدنه کې د کرنې وزارت د نظارت او ارزونې رییس امان الله شاهي، د پلان او برنامو لوی ریاست استازو او همدارنګه د ننګرهار د کرنې ریاست تخنیکي او مسلکي کارمندانو او آمرینو ګډون درلود.
د ننګرهار کرنې رییس مولوي عبدالستار اخندزاده راغلي پلاوي ته د ښه راغلاست ترڅنګ په ننګرهار کې د کرنې وزارت د پراختیایي پروژو او همکارو مؤسساتو له لورې د تطبیق شوو، روانو او راتلوونکو پروژو په هکله معلومات وړاندې کړل.
ښاغلي اخندزاده ننګرهار کې د کرنې او مالدارۍ په برخه کې ستونزې،غوښتني او وړاندیزونه هم د پلاوي سره شریک کړل.
د کرنې وزارت د پلان او برنامو د همغږۍ لوی رییس مولوي عبدالغفور وویل، چې د دوی دسفر موخه د غیر دولتي ادارو مؤسسو او پراختیایي بودجې له لارې د ټولو تطبیق کېدونکو پراختیایي کرنیزو او مالدارۍ پروژو له نږدې څخه څارنه، د شته ستونزو په نښه کول،ستونزو ته حل لارې موندل، ارزونه او د پروژو د کیفیت او شفافیت ډاډ ترلاسه کول دي.
د پلان لوي رییس زیاته کړه ننګرهار یو لوي او کرنیز ولایت دي نو د مؤثره پروژو د ښه تطبیق او نوو ساحو په نښه کولو په موخه به خپلې پروژې او ارزونې پراخی کړي.
