میدان وردګ کې د پیازو او کچالو ۱۴۳ زېرمتونونه ګټې اخیستنې ته وسپارل شول

۸ لیندۍ ۱۳۹۹
د کرنې، اوبولګولو او مالدارۍ وزارت د کرنیزو محصولاتو مدیریت د طرحې په اډانه کې او د دې وزارت د بڼوالۍ ځنځیري ارزښت د ودې سکټوري پروژې له لارې، د میدان وردګو ولایت په مرکز میدان ښار او ددې ولایت د «سیدآباد، بندچک، جلریز، نرخ او دایمیرداد» په ولسوالیو کې د پیازو او کچالو ۱۴۳ زېرمتونونه جوړ او ګټې اخیستنې ته وسپارل. دغه زېرمتونونه ۱۰۸ یې د کچالو ساتنې او ۳۵ نور یې د پیازو ساتنې لپاره جوړ شوي دي. برخمن شوي بزګران اوس کولا شي، چې دکال سلګونه ټنه پیاز او کچالو چې د دوی له مصرف او پلور څخه زیاتیږي، په دغو زېرمتونونو کې یې زېرمه کړي.
ددغو زېرمتونونو رغنیزې چارې د کرنې وزارت د بڼوالۍ ځنځیري ارزښت د ودې سکټوري پروژې  (HVCDSP) له خوا پرمخ وړل کېدل.
ددغو زېرمتونونو ټولیز لګښت ۸۳میلیونه افغانۍ ده. ددې لګښت ۸۰ سلنه دکرنې وزارت او ۲۰ سلنه نور یې برخمن شوي بزګران ور کړي دي.
یاد زېرمتونونه هر یوه یې دڅه باندې ۱۲ مټریک ټنه پیاز او کچالو د ساتنې وړتیا لري. له دغو زېرمتونونو څخه په استفادې سره د میدان وردګو ولایت بزګران کولای شي، چې دکال سلګونه مټریک ټنه پیاز او کچالو زېرمه او په مناسب وقت کې یې بازار ته وړاندې کړي.
دغه پروژې ددې ولایت د کرنیزو محصولاتو مدیریت، د بڼوالو او بزګرانو د محصولاتو خوندي کولو او د دوی د عوایدو زیاتولو په پار پلي شوي دي.