میدان وردګو کې ۱۵ چکډېمونه جوړېږي
۱۸ زمری ۱۴۰۳ه.ش
۴ صَفَر المُظَفَّر ۱۴۴۶ه.ق
د میدان وردګو په ولایت کې د اوبو د مهارولو په موخه د لومړي ځل لپاره د ١٥ چیک ډېمونو سروې وشوه.
میدان وردګ یو له هغو ولایتونو څخه دی، چې ډېرې اوبو لري خو مهارولو ته یې په تېر کې پاملرنه نه وه شوې.
د یاد ولایت د کرنې اوبو لګولو او مالدارۍ رییس مولوي محمد ادریس حنیف وایي، د یادو چیک ډېمونو سروې بشپړه شوې چې ژر تر ژره به عملاً د جوړېدا چارې یې پیل شي.
ښاغلی حنیف زیاته کړه: «موږ په ټول توان د اوبو د مهارولو هڅه کوو تر څو هېواد مو د اوبو له نشت نه وژغورل شي.»
دغه چکډېمونه به د سېلابونو اوبو مهار او کرنیزو ځمکو ته د اوبو رسونې په موخه جوړ شي.
له دې وړاندې هم په دغه ولایت کې د اوبو زېرمې او مدیریت لپاره یوشمېر چکډېمونه جوړ او ګټې اخیستنې ته سپارل شوې دي.
