میدان وردګو کې د نیالګیو کېنولو کمپاین پیل شو
۲۹ کب ۱۴۰۲ه.ش
۹ رَمَضانُ المُبارَک ۱۴۴۵ه.ق
د میدان وردګ ولایت په مرکز میدانښار کې دکرنې، چاپېریالساتنې او ښاروالۍ ریاستونو په ګډه همکارۍ د ولایت په کچه د ۱۴۰۳ لمریز کال لپاره بوټو او نیالګیو کېنولو کمپاین د د نیالګیو کښېنول وچکالۍ له منځه وړل تر عنوان لاندې پیل شو.
د دغه کمپاین پرمهال د میدان وردګو والي قاري بختیار معاذ د بوټو او نیالګیو پر کېنولو ساتنې او پالنې ټینګار وکړ له اړونده ادارو او ولسونو یې وغوښتل، چې د ولایت د زرغونتیا په موخه هوا او اقلیم ته په کتو سره نیالګي کېنوي او په پالنه کې یې خپل مسؤلیت ترسره کړي.
د میدان وردګو ولایت والي یو شمېر ادارو مسؤلینو ته سپارښتنه وکړه، چې د نیالګیو د پالنې، ساتنې او اوبو رسولو ته ځانګړې کمېټه جوړه کړي ترڅو په دوامداره توګه ترې څارنه وکړي.
همداشان د یاد کمپاین پرمهال میدان وردګو ولایت دکرنې رییس مولوی عبد الجبار خالد، چاپېریال ساتنې رییس مولوي الله محمد ذاکر او ښاروال مولوي عبدالله درویش له شرعي، اقتصادي، معنوي، روغتیایي او د چاپېریال د ښکلا په برخه کې د نیالګیو او بوټو د کېنولو په ارزښت هر اړخیزې خبرې وکړې، دوی له ولسونو، ښاریانو او ادارو له مسؤلینو وغوښتل، چې د خپلو امکاناتو څخه په ګټې اخیستنې سره همکار پاتې شي.
د یادونې وړ ده چې په دغه کمپاین کې د ملکي او نظامي ادارو مسؤلینو، قومي مشرانو، ښاریانو او ځوانانو ګډون کړي ؤ.
دا په داسې حال کې ده، چې دکرنې وزارت له خوا د ۱۴۰۳ کال د نیالګیو کښېنولو کمپاین پیل شوی، چې په ترڅ کې به یې د هېواد د زرغونتیا لپاره په میلیونونو نیالګي کښېنول شي.
